អ្នកនាំពាក្យ៖ ព្រះមហាក្សត្រគ្មានព្រះរាជតួនាទីក្នុងកិច្ចអន្ដរាគមន៍រឿងលោកកឹម សុខា នោះទេ
31-May-2016 | ដោយ មែន កំសត់
ភ្នំពេញ ៖ មើលតាមរដ្ឋធម្មនុញ្ញ និងបទពិសោធន៍កន្លងមក ព្រះមហាក្សត្រទ្រង់ពុំមានព្រះរាជតួនាទីក្នុងការអន្ដរាគមន៍ករណី លោកកឹម សុខា ទេ។ នេះជាការបញ្ជាក់របស់លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ដ្រី។
ថ្លែងក្នុង បទសម្ភាសន៍ជាមួយរស្មីកម្ពុជា នាល្ងាចថ្ងៃទី៣០ ខែឧសភា ឆ្នាំ២០១៦ នេះ លោកផៃ ស៊ីផាន បានឲ្យដឹងថាថ្វីដ្បិតតែព្រះមហាក្សត្រជាព្រះប្រមុខរដ្ឋ តែទ្រង់មិនកាន់អំណាចឡើយ។ ហើយប្រសិនបើមានការដាក់ញ្ញតិថ្វាយគឺទ្រង់អាចដើរតួជា ព្រះរាជអាជ្ញាកណ្ដាល ដើម្បីជួយសម្របសម្រួល ប៉ុន្តែការសម្រេចយ៉ាងណានោះ គឺអាស្រ័យលើមតិភាគច្រើននោះទេ។
ក្រៅពីនេះទៀត មន្ដ្រីនាំពាក្យដ៏សកម្មរូបនេះ ក៏បានបន្ថែមទៀតថា បើតាមការពិសោធន៍កន្លងមកគឺព្រះអង្គទ្រង់នឹងឡាយព្រះហស្ថលេខាទទួល ញ្ញតិដែលបានដាក់ថ្វាយទ្រង់ ហើយបន្ទាប់មកទ្រង់នឹងបញ្ជូនញត្តិនោះទៅស្ថានប័នពាក់ព័ន្ធដើម្បី ធ្វើការពិចារណា។
លោកផៃ ស៊ីផាន បានមានប្រសាសន៍ថា “...អ្វីដែលជាការពិសោធន៍ ព្រះអង្គតែងតែចុះហត្ថលេខាទទួល ហើយផ្ញើមកស្ថាប័នពាក់ព័ន្ធ ដើម្បីឲ្យពិចារណាសម្រេច ហើយទូលថ្វាយទៅព្រះវិញ...”។
លោកផៃ ស៊ីផាន បានបញ្ជាក់ថា ព្រះមហាក្សត្រទ្រង់ពុំមានព្រះរាជសិទ្ធិសម្រេចជាអត្តនោម័ត លើកិច្ចការណាមួយពុំមែនជាចៅក្រម ពុំមែនជាតុលការ និងពុំមានអ្នកនយោបាយនោះទេ ថ្វីដ្បិតតែថាព្រះអង្គទ្រង់ជាព្រះប្រធាននៃស្ថាប័នកំពូលៗរបស់ជាតិ តែយ៉ាងណាកិច្ចការរដ្ឋបាល គឺស្ថិតនៅស្ថានប័នជំនាញ និងមតិភាគច្រើនជាអ្នកសម្រេច។
“ព្រះអង្គទ្រង់មិនយកព្រះទ័យ ទុកដាក់ថា អ្នកណាខុស អ្នកណាត្រូវនោះទេ គឺទ្រង់ជាព្រះរាជតំណាងអធិបតីភាពទាំងស្រុង...ព្រះមហាក្សត្រលោក មិនមែនជាចៅក្រម លោកមិនមែនជាតុលាការ ...”។រំលឹកដល់ រឿងលោកកឹម សុខា មន្ដ្រីនាំពាក្យរូបនេះ បានបញ្ជាក់ថា ព្រះមហាក្សត្រនឹងពុំអាចមានព្រះរាជអន្ដរាគមន៍អ្វីទេដោយសារថា ការលើកឡើងរបស់គណបក្សសង្គ្រោះជាតិ ដែលថាកម្ដៅនយោបាយនៅកម្ពុជាកំពុងតែមានសភាពធ្ងន់ធ្ងរនោះគឺពុំមែន ជាការពិត គឺគេពុំឃើញមានអ្វីក្ដៅទេ ប៉ុន្តែបញ្ហារបស់លោកកឹម សុខា គឺដោយសារតែគាត់ប្រព្រឹត្តខុសច្បាប់។
លោកផៃ ស៊ីផាន “ករណីនេះវាអត់មានពាក់ព័ន្ធនឹងអង្គព្រះមហាក្សត្រផងគាត់សុំឲ្យ ព្រះអង្គជួយសម្រួលអារឿងកម្ដៅនយោបាយ...យើងអត់ឃើញកម្ដៅនយោបាយនៅ កន្លែងណាផងហ្នឹង យើងឃើញតែមានការចោទប្រកាន់ពីរឿងការងារយុត្តិធម៌ ដែលចោទប្រកាន់ឯកឧត្តមកឹម សុខា...ហើយបើគាត់មិនសុខចិត្តនឹងការសម្រេចរបស់សាលាដំបូងរាជធានី ភ្នំពេញគាត់អាចប្ដឹងទៅតុលាការឧទ្ធរណ៍ ឬបន្ដទៅតុលាការកំពូលទៀតបាន...”៕
ចំនួនអ្នកទស្សនា
- ថ្ងៃនេះ461
- ម្សិលមិញ3511
- សប្តាហ៍នេះ13111
- ខែនេះ238781
- ឆ្នាំនេះ238781
- សរុប20681237